С. Мұқанов атындағы облыстық әмбебап ғылыми кітапхана
Қазақстан Республикасы Тәуелсіздігінің 30 жылдығы қарсаңында бірқатар игі шаралар жүзеге асырылды. Соның ішінде ел игілігіне жарайтын құнды кітаптар баспадан шығып жатқаны қуантарлық жағдай. Кеше М. Қозыбаев атындағы Солтүстік Қазақстан университетінің профессоры, Қазақстанның еңбек сіңірген қайраткері Зарқын Тайшыбайдың «Абылай хан тарихы» атты 3 томдық ғылыми еңбегінің тұсаукесері өтті. Шараға өңір әкімінің орынбасары Ғани Нығыметов, облыстың құрметті азаматтары мен шаһар зиялылары және студенттер қатысты.
Университет ректоры Ерлан Шұлановтың қолдауымен Алматыдағы «Атамұра» баспасынан жарық көрген кітапта Абылай ханның өмірі мен қызметіне арналған құжаттар топтастырылған.
Зарқын Сыздықұлы Абылай ханның тарихын зерттеуді әріден бастаған. Ол 2007 жылы «Еліміздің интеллектуалдық әлуеті» бағдарламасы бойынша «Абылай ханның өмірі мен қызметі» деген тақырыпта мемлекеттік грантты иеленсе, 2009 жылы «Қазақстанның баянды дамуының кепілі ретінде патриоттық тәрбие беру бағдарламасы аясында Абылай ханның өмірі мен қызметінің тарихи және тарихнамалық мәселелері» жобасы бойынша екінші рет тағы грант еншілеген. Тарихшы осы тақырыпқа дендегеніне 40 жылдай ғұмырын сарп еткенін айтады.
«Қазақтың мың жылдық тарихында неше түрлі ел бастаған хандар, қол бастаған батырлар, сөз бастаған шешендер болған. Үш жүздің басын қосқан Абылай хан — біздің Тәуелсіздігіміздің негізін салушы. Бүгінде қазақтың қаншама жеріне ел қонып, қиыр жайлап отырғаны Абылай бабамыздың арқасы. Оның кім екендігі туралы аңыз да, ертегі де көп. Мен Абылайдың атқа мінгенінен бастап, өмірінің аяғына дейін жазбаша қандай құжаттар қалғанын жинауды мақсат еттім. Оның өміріне байланысты сан-салалы зерттеуімді үш томға жинақтадым. Бұл қазақ тарих ғылымында тұңғыш рет шығып отыр», — дейді Зарқын Сыздықұлы.
Ғалым осы үш томды жазардан бұрын мыңнан аса құжат жинапты. Ресей мен Қытайдан тыс әлемнің бірқатар елінің архивіне үңілген екен.
Бектұрған ЛАҚАДЫЛ, «Soltustik Qazaqstan»
__________________________________________________________________________________________________________________
/ Soltustik Qazaqstan.-16 желтоқсан.-14 бет.-2021 жыл.