С. Мұқанов атындағы облыстық әмбебап ғылыми кітапхана
2022 жылдың 21 қаңтары күні Сәбит Мұқанов атындағы Солтүстік Қазақстан облыстық әмбебап ғылыми кітапханасында жерлесіміз, мемлекет және қоғам қайраткері, аса көрнекті ақын әрі композитор Кәкімбек Салықовтың туғанына 90 жыл толуына арналған «Ұшқыр сезім, терең ойдың ақыны» атты әдеби-музыкалық кеш өтті.
Шараны осы кітапхананың бөлім басшысы Майра Әшімова жүргізді.
Шараға зиялы қауым өкілдері, еңбек ардагерлері, студенттер, «Қаламгер» клубының мүшелері, Кәкімбек Салықовтың туысқандары, жерлестері қатысты.
Шара Ерік Асқаров атындағы жас ақындар мектебінің түлегі, колледж студенті Дамир Амангелдінің Кәкімбек Салықовқа «Арнау» өлеңімен ашылды
М.Қозыбаев атындағы СҚУ жанындағы Тіл және әдебиет институты қазақ тілі мен әдебиеті кафедрасының аға оқытушысы Көкбас Жазира Кәкімбек Салықовтың өмірі мен шығармашылығына жан-жақты тоқталды. Осы университеттің студенті Диас Аяған және Е.Серкебаев атындағы өнер колледжінің студенті Жалғас Мұқан Кәкімбек Салықовтың өлеңдерін мәнерлеп оқып берді.
Шара барысында Кәкімбек Салықовтың өлеңдеріне жазылған әндер тыңдалды.. Ақан сері атындағы облыстық филармонияның әншісі Ғалымжан Нұрпейісов «Үш арыс» әнін, әнші Дәстен Баймұқанов «Сағыныш» әнін өте тамаша орындап берді. «Жезкиік», «Аққу әні» әндері бейне жазба арқылы тыңдалды. Кәкімбек Салықов туралы «Тағдыр жолы» атты фильм көрсетілді.
Кәкімбек Салықовтың жерлестері – Мұрат Жантілеуов пен Сапыш Шубайқызы естеліктерімен бөлісті. Туысқан інісі Зарап Құрманқұлов Кәкімбек Салықовтың отбасы туралы әңгімеледі, дарындылығына тоқталды. Көшеге, мектепке аты берілсе,- деген ұсынысын айтты. Шараны ұйымдастырушыларға алғысын айтты.
Шараға қатысушылар «Жырдың жезкиігі» атты кітап көрмесін тамашалады.
#БиблиотекаимСМуканова#ЛучшаяБиблиотекаРК#СамыйЧитающийРегионСКО#Коворкинг#ПарасатЖолы#Мейкерспейс#Мероприятия#Информация#Чтение#Книги#ҰшқырСезімТереңОйдыңАқыны