С. Мұқанов атындағы облыстық әмбебап ғылыми кітапхана
2022 жылдың 12 мамыры күні Сәбит Мұқанов атындағы Солтүстік Қазақстан облыстық әмбебап ғылыми кітапханасында жерлесіміз, көрнекті ақын, облысымызға ғана емес, республикаға белгілі журналист, қоғам қайраткері Ғалым Малдыбаевтың туғанына 120 жыл толуына арналған «Жыршыл жүрек» атты поэзия кеші өтті.
Кешімізге М.Қозыбаев атындағы СҚУ жанындағы Тіл және әдебиет институтының студенттері мен оқытушылары, Әбу Досмұхамбетов атындағы дарынды балаларға мамандандырылған гимназия-интернаттың оқушылары, облыстық ардагерлер кеңесінің мүшелері, журналистер, «Қаламгер» клубының мүшелері, Ғалым Малдыбаевтың балалары, жерлестері қатысты.
Кешті бөлім басшысы Майра Әшімова жүргізді.
Кешіміз жас ақын, М.Қозыбаев атындағы СҚУ жанындағы Тіл және әдебиет институтының 2 курс студенті Диас Аяғанның Ғалым Малдыбаевқа «Арнау» өлеңімен ашылды.
Алғашқы болып сөз сөйлеген белгілі жазушы, журналист, Қазақстан Жазушылар одағының Солтүстік Қазақстан облыстық филиалының директоры, облыстық «Солтүстік Қазақстан» газетінің директоры Жарасбай Сүлейменов Ғалым Малдыбаевтың қазақ әдебиетінде өзіндік орны бар ақын екенін, өте білімдарлығын, республикамыздың көптеген облыстарында қазақ газеттерінің шығуына және қалыптасуына өлшеусіз еңбек сіңіргенін тілге тиек етті.
М.Қозыбаев атындағы Солтүстік Қазақстан университетінің профессоры, филология ғылымдарының кандидаты Жанар Таласпаева ақынның шығармашылығына жан-жақты тоқталды.
Белгілі жазушы, журналист Жақсыбай Самрат Ғалым Малдыбаевтың отбасы, өнегелі ұрпақтары жайлы сөа қозғап, ақынның есімін мәңгі есте қалдыру жөнінде әлі істер атқарылу керегін баса айтты.
Ғалым Малдыбаевтың жерлесі, ардагер ұстаз Жұмаш Сейітбеков жүрек тебірентер естеліктерімен бөлісті.
Ақын, Қазақстан Журналистер одағының мүшесі Марал Зейнел-Ғабиқызы және студенттер Қызғалдақ Бердімұрат, Қарақат Нұржанова, Ақәділ Талапбеков, Ерлан Жұмақан ақынның жырларын оқып, кештің ажарын аша түсті.
Ақынның қызы Ғалия Ғалымқызы өзінің әкесіне арнап шығарған «Әкеме» атты өлеңін оқып берді.
Кешке жиналғандардың назарына «Жыр тарланбозы» атты кітап көрмесі ұсынылды. Слайд көрсетілді.
